Kandidati për deputet në zgjedhjet e fundit në listën e PDK-së, Blerim Latifi ka thënë se nuk është më pjesë e PDK-së.

Përmes një postimi në Facebook, Latifi ka sqaruar se pasi që ka përfunduar mandati i Kadri Veselit si kryetar i Kuvendit të Kosovës, ka përfunduar edhe puna e tij si këshilltar politik.

Kësisoj, Latifi ka sqaruar se nuk është pjesë e asnjë forumi në PDK, as anëtar kryesie, as anëtar i Këshillit Drejtues, as anëtar i ndonjë dege apo nëndege.

Postimi i plotë:

Sqarim për mediat

Mandati i Kadri Veselit si kryetar i Kuvendit të Kosovës ka përfunduar. Rrjedhimisht, edhe emërimi im si këshilltar politik i tij. Unë nuk jam pjesë e asnjë forumi në PDK, as anëtar kryesie, as anëtar i Këshillit Drejtues, as anëtar i ndonjë dege apo nëndege. Rrjedhimisht qëndrimet e mia publike nuk reflektojnë pikëpamjet e PDK-së, në asnjë formë.

Prandaj, cilësimi i qëndrimeve të mia si qëndrime të PDK-së është krejtësisht i pasaktë. Është dezinformim. Personalisht vazhdoj të kem konsideratë të lartë për kryetarin e PDK-së dhe këshillat e mia për të mbesin vetëm në nivelin e raportit miqësor dhe joformal. Unë ndihem mirë dhe krenar me bashkëpunimin pesë vjeçar me të. Kjo është e tëra!